Hindstan Baş ministrı Modi: “Ukrainadağı bäreleşlär kiçekmästän tuqtatılsın”
Hindstan Baş ministrı Narendra Modi Ukraina İlbaşı Volodimir Zelenskiy belän telefon söyläşüen ütkärde
Hindstan Tışqı êşlär ministrlığınnan yasalğan belderüdä liderlarnıñ ike yaqlı xezmättäşlekne nığıtu häm 24nçe fevral’dän birle däwam itüçe bäreleşlär turında fiker alışuı äytelde.
Belderüdä Modineñ Ukrainadağı bäreleşlärneñ kiçekmästän tuqtatıluı çaqıruın köçle räweştä täqrarlawı citkerelde.
Hindstannıñ härtörle tınıçlıq tırışlığın xuplawına basım yasalğan belderüdä Modineñ Ukrainada bäreleşlärdän täêsirlängän xalıqqa humanitar yärdämneñ däwam iteläçäge garantiyasın birüe äytelde.
Ayıruça söyläşü waqıtında Hindstannıñ G20 çirattağı räislege belän Ukrainanıñ suğışnı beterü öçen täq’dim itkän 10 mäddälek "Ukraina formulası” isemle tınıçlıq formulasınıñ quzğatıluı iskärtelep uzıldı.
Zelenskiy isä “Twitter”dan yasağan belderüendä:
"Hindstan Baş ministrı Modi belän telefon söyläşüen ütkärdem häm G20neñ uñışlı çirattağı räislegen telädem. Bu platformada tınıçlıq formulabıznı citkergän idem, xäzer Hindstannıñ monıñ tormışqa aşırıluında qatnaşaçağına ışanam. Ayıruça Berläşkän Millätlär Oyışmasındağı humanitar yärdäme häm yaqlawları öçen Modigä räxmätemne belderdem,” – dip äytte.
10 mäddädän torğan Ukrainanıñ tınıçlıq formulasınıñ isä atom-töş iminlege, azıq-tölek häm ênergetika qurqınıçsızlığı belän Rusiyäneñ Ukrainadağı xärbi köçlären çigenderüe kebek mäs’älälärgä yünältelüe belderelä.
