Zelenskiy belän Baydennıñ matbuğat oçraşuı
Amerika Quşma Ştatları İlbaşı Djo Bayden, Ukraina Däwlät başlığı Volodimir Zelenskiygä borçılırğa kiräk bulmawın äytep: “Ukraina anda bulğanda bez Ukraina belän bergä bulaçaqbız,” – dide
Rusiyäneñ ilenä suğış başlatqan 24nçe fevral’dän birle berençe çit il säfären yasawçı Ukraina İlbaşı Zelenskiy belän AQŞ Prezidentı Bayden Aq Yorttağı ike yaqlı söyläşülärdän soñ urtaq matbuğat oçraşuın oyıştırdı.
Bayden Rusiyä İlbaşı Vladimir Putinnıñ, Ukrainadağı kritik asqormalarnı nişan itep alıp, suğışnı tağın da kiskenläşterüen äytte.
Bayden 300 könnän artıp kitkän suğış waqıtında Ukraina xalqınıñ Rusiyägä häm dönyağa illärenä bulğan mäxäbbätlären häm qaqşamas täwäkkälleklären kürsätüen belderde.
Amerika Quşma Ştatlarınıñ bügengä qadär Ukrainağa kürsätkän yärdämnärne añlatuçı Bayden ileneñ Ukrainağa yärdäm täêmin itüen däwam itäçägen iskärtep uzdı.
Bayden, Zelenskiygä borılıp: "Xörmätle Prezident, borçıluığızğa kiräk yuq. Ukraina anda bulğanda bez Ukrainanıñ yanında bulaçaqbız,” – dip äytte.
Zelenskiy dä: "Suğışnıñ soñğı 30 könendä Amerika Quşma Ştatları belän mönäsäbätlärebezdä yaña çorğa kerdek häm çın berlektäş buldıq”, - dip belderde.
Ukrainanı yaqlağannarı öçen Baydenğa räxmäten citkerüçe Zelenskiy “Patriot” hawa saqlanu sistemalarınıñ üzläre öçen bik möhim buluın äytte.
Ukraina liderı Putinğa äyter süzläre barmı-yuqmı digän sorawğa:
"Däwlät başlığı bulğaç 2019da Normandiyada Putin belän oçraşqan idek. Aña ilebezgä qarşı ğomum okkupaśiyanıñ bulmawı zarurlığın, agressiyanı tuqtatırğa kiräklegen häm xäzerge problemalarğa diplomatik çişeleş bularaq ilebezneñ cir bötenlegeneñ täêmin itelüe häm Allah saqlasın total’ suğışqa totınmawıbız zaruriyäten äytkän idem. Ul da “Mondıy närsä bulmayaçaq,” – digän ide. Läkin ul yalğanlıy ide. Bu oçraqta min aña nindi yullama citkerä alam?", - dip cawap birde.
