Talibanğa böten dön'yadan tänqıyt' yawa

Äfğanstanda Taliban idaräseneñ qızlarnıñ universitetta belem aluın tuqtatu turındağı qararına ber-ber artlı tänqıyt’ yawa.

Amerika Quşma Ştatları, Angliyä, Germaniyä, Franśiyä häm Kanadanı üz êçenä aluçı 12 ilneñ tışqı êşlär ministrları belän Awrupa Berlege isemennän tışqı mönäsäbätlär häm iminlek säyäsäte yuğarı wäkile Djozef Borrell berdäm belderü yasadı.   

Anda Talibannıñ qız studentlarnıñ universitetta uquların tuqtatu qararı ğayeplände. İdaräneñ xatın-qızlarğa basım çaralarınıñ räximsez häm sistemalı bularaq däwam itüe äytelde.  “Taliban bu ğamälläre belän üzen äfğan xalqı häm xalıqara cämäğat’çelektän tağın da çitläşterä” diyelä belderüdä.

Farsı qultığı illäre häm İslam xezmättäşlege oyışması da qararğa rizasızlıq belderde. Soğud Ğaräbstanı, Katar, Baxreyn, Berläşkän Ğaräp ämirlekläre Talibannı kire uylarğa çaqırdı.

Äfğanstandağı waqıtlı xökümätneñ qararına Türkiyä dä reakśiyä belderde. Tışqı êşlär ministrlığı “Äfğanstandağı barlıq qız balalarğa belem alu xoquqın tanu ilneñ üseşe häm kiläçäge öçen ähämiyätle” dip citkerde häm qararnı qabat qarap çığarğa çaqırdı.

Türkiyä ilbaşı süzçese İbrahim Kalın da sośial’ media akkauntı aşa belderü yasap, älege qararnıñ islam dine ruxına turı kilmäwen assızıqladı.

Süz uñayınnan, Äfğanstannıñ Cälalabad şähärendä Talibannıñ qararına qarşı protest oyıştırıldı.