Yevropol yalğan daru häm doping matdäläre citeştergän cinayät’ oyışmalarına operaśiya oyıştırğan

Awrupa Berlege poliśiya oyışması Yevropol koordinaśiyäse astında 28 ildä ütkärelgän yalğan daru häm doping matdäse operaśiyälärendä 349 keşene qulğa alğannar häm 10 million 500 meñnän artıq yalğan êşlänmä konfiskaśiyälängän.

Yevropolnıñ yazma belderüendä äytelgänçä, ağımdağı yılnıñ aprel’-oktyabr’ aylarında yalğan daru häm doping matdäläre citeştergän 59 cinayät’ oyışmasına operaśiya oyıştırılğan.

Älege operaśiyälärdä 10 million 500 meñnän artıq yalğan produkt qulğa töşerelgän. Alarnıñ bazar bäyäse - 40 million yevrdan artıq.

Operaśiya qısalarında darular citeşterelgän 10 zakonsız laboratoriya yabılğan, şulay uq 1 million yalğan Kovid -19 testı da konfiskaśiyälängän.

Awrupa kontrabanda belän köräş ofisı, Bötendön’ya dopingqa qarşı köräş agentlığı häm Bötendön’ya tamğaxanä agentlığı yärdäm kürsätkän operaśiyälärdä Awrupa Berlegenä kergän 19 ilneñ qurqınıçsızlıq köçläre belän bergä Albaniya, Bosniya –Gerśegovina, Kolumbiya, Gruziya, İslandiya, Tön’yaq Makedoniya ,Serbiya, Şveyśariya, AQŞ qurqınıçsızlıq bülekläre qatnaşqan häm bu illärdä 195 yuridik tikşerü ütkärelä.

Yalğan darular Awrupada könnän –kön arta barğan sośial’ problemağa äylänä, älege cinayät’ êşennän alınğan kerem narkotiklar satudan alınğan keremgä yaqın dip belderä Yevropol.