İranda tağın ber keşeneñ ülem cäzası başqarıldı

İranda baruçı rizasızlıq çaraları belän bäyle tağın ber keşeneñ ülem cäzası tormışqa aşırıldı.

İran mäxkämä sistemasına qarawçı Mizan xäbär agentlığı citkergänçä, Mäşxädtäge çaralarda iminlek köçläre äğ’zası Xösäyen Zäynälzadä häm Daniyal Rızazadäne pıçaq qadap üterüdä häm 4 keşene yaralawda ğayeplänüçe Mäcid Rıza Raznävärdneñ xökem qararı cirenä citkerelgän. Anı xalıqqa açıq urında asalar. 

İranda Mäxsä Ämini isemle ber qız, äxlaq poliśiyäse qulğa alğaç, xäle naçarayıp, ülgännän soñ başlanğan häm yaqınça 3 ay däwam itüçe rizasızlıq çaraları belän bäyle räweştä älegä qadär 11 keşegä ülem cäzası qararı çığarıldı. Alardan 23 yäş’lek Muxsin Şikarinıñ qararı 8nçe dekabr’dä tormışqa aşırıldı. BMO älege qararnı ğayepläde.

Rizasızlıq çaralarında qatnaşuçılarnı ülem cäzasına tartuğa reakśiyälär il êçendä dä, tışında da arta bara.