Yulda cir ubıldı: 27 keşe ülde

Kolumbiyädä maşina yulında cir ubılu säbäple 27 keşeneñ ğomere özelde. Waqıyğa Risaral’da töbägeneñ Kali-Kondoto yulında buldı. Anda cir ubılıp avtobus häm başqa maşinalar tufraqqa kümelep qaldı.

Hälakätkä yulıqqannarnı qazıp çığaru öçen qotqaru törkemnäre êşçänlegen däwam itä.   

Pereyra yanğın sünderü brigadasınıñ citäkçese Alexandro Arango tufraq astında tögäl genä niçä keşe barlığın belmäwlären, qotqaru êşçänlegendä awır êş maşinaların qullanğançı tağın ber qat êtlär belän êzläwlären belderde.

İlbaşı Gustavo Petro sośial’ media aşa ğailälärneñ qayğısın urtaqlaştı.

“Risaral’dadağı faciğada xäzergä qadär 3 balanı da kertep 27 keşeneñ ğomere özelüen xäbär itärgä mäcbürmen. Xökümätebez qorbannarnıñ ğailäläre öçen qulınnan kilgänne êşläyäçäk” dip yazdı ul.

Kolumbiyädä aylar buyı däwam itüçe köçle yawım-töşem kiterep çığarğan su basu häm cir şuışuda şaqtıy keşeneñ ğomere özelde.