Qar körägändä üldelär

AQŞnıñ N’yu-York ştatında qar buranı arqasında 2 keşeneñ ğomere özelde. Töbäktä pänceşämbe könnän birle buran dulıy. Şul säbäple N’yu-York avtomobil’ trassası häm başqa bik küp yul xäräkät öçen yabıldı, transportta özekleklär kilep çıqtı.  

Wäqalätlelär citkergänçä, Êri rayonında qar köräwçe ike keşe yöräk öyänäge kiçerep ülgän. Milli hawa torışı xezmäte qar biyeklegeneñ Êri küle tiräsendä 1 metr 70 santimetrğa citüen xäbär itä.

Ştatnıñ iñ küp keşe yäşi torğan ikençe şähäre Buffaloda qar qalınlığı 36 santimetr bulğan. Köçle yawım-töşem arqasında töbäktä êlektr özelä.

Êri töbäge idaräçese Mark Polonkarś Gamburg bistäsendä qar arqasında ber binanıñ öleşçä cimerelüen belderde.