AQŞta isertkeç êçemleklär arqasında ülüçelär arta
20 yäş’tän 49ğa qadärgelär arasında här 5 ülemneñ berse şunıñ belän bäyle
AQŞta 20 yäş’tän 49ğa qadärgelär arasında här 5 ülemneñ berse çiktän tış küp alkogol’ qullanu belän bäyle.
Amerika tabiblar berlege çığaruçı JAMA Network Open jurnalında basılğan ber tikşerenüdä ildä isertkeç êçemlek arqasındağı yuğaltularğa iğ’tibar cälep itelä. 20 yäş’tän 49ğa qadärgelär arasında här 5 ülemneñ berse şul säbäptän bulsa, 20 belän 64 yäş’ arasındağılarnı qarağanda, kürsätkeç här 8 keşegä 1 turı kilä.
Tikşerenüne citäklägän tabib Marissa Êsser alkogol’ qullanıp ülüçelär sanınıñ ştatqa qarap üzgärüen, tik monıñ il külämendä kirtälänergä tiyeşle ülem säbäpläreneñ berse buluın äytä.
Belgeç tikşerenüdä nigez itep 2015tän başlap 2019nçı yılğa qadär ştatlarda häm ildäge ülem oçraqları alınuın belderä.
Êsser sannarnıñ soñğı 10 yılda isertkeç êçemlek näticäsendä ülüçelärneñ artuın kürsätüen iskärtä.
“Ştatlar häm cirle idarälär alkogol’neñ sanın häm satıp alu mömkinlegen kimetep, bäyäsen kütärü öçen dälillängän strategiyälär qullanıp irtä ülemnärne buldırmıy qala ala,”-di tabib. Anıñça, isertkeç êçemleklärgä salımnı arttıru yäisä satuğa çikläwlär kertü dä faydalı bulırğa mömkin.
