Qabilä bäreleşlärendä 250 keşe ülde

Sudannıñ Zäñgär Nil töbägendä cäydän birle baruçı qabilä bäreleşlärendä 250 keşeneñ ğomere özelde.  

BMOnıñ gumanitar êşlär koordinaśiyä ofisınnan belderülärençä, protestçılar töbäk märkäze bulğan Demazin şähäre belän başqala Xartumnı ber-berse belän bäyläwçe yulnı xäräkät öçen yaptı.

Xisaplardan kürengänçä, Ved äl-Maxi töbägendäge awıllarda öylär cimerelgän, yaqınça 250 keşe ülgän, 572dän artıq keşe yaralanğan häm 7 meñgä yaqın keşe küçenep kitärgä mäcbür bulğan.

İyül’ ayınnan birle Zäñgär Nil töbägendä 70 meñnän artıq keşe yäşägäñ urının taşlap kitkän.

Sudan sälamätlek saqlaw ministrlığı cirlektä Xausa häm Xemek qabiläläre arasında iyül’ ayında bulğan bäreleşlärdä 109 keşeneñ ülüen beldergän ide. 2nçe sentyabr’dä qabat qabınğan çualışlarda 18 keşe hälaq buldı, 23e yaralandı. 13nçe oktyabr’dä isä waqıyğalar yañadan canlanıp 200dän artıq keşeneñ ğomeren özde. Qabilä bäreleşlärenä protest belderüçelär gubernator binasına ut törtte häm waqıyğalarnıñ kontrol’gä alınmawı öçen Zäñgär Nil töbäge räise Äxmät äl-Umde Badenıñ wazıyfasınnan kitüen taläp itte.

Töbäk xökümäte 21nçe oktyabr’dä Zäñgär Nildä bulğan qabilä bäreleşläre arqasında ber aylıq “ğadättän tış xäl” iğ’lan itte, tönlä uramğa çığu tıyıldı.   

Bäreleşlärneñ Xemek qabiläseneñ töbäktäge cirle xalıq bulmawı sıltawı belän Xausa qabiläsen yıraqlaştırırğa teläwe belän başlanuın söylilär.