Qartlıqta aqıl zäğıyf'legen niçek buldırmasqa?

Kitap uqu, yoga yasaw, ğailä yäisä duslar belän waqıt uzdıru şikelle şöğıl’lär demenśiyä barlıqqa kilü yanawın kimetergä yärdäm itä.

News-medical.net internet säxifäseneñ xäbärenä qarağanda, näticäse “Neurology” jurnalında basılğan tikşerenüdä tanıp-belü, fizik häm sośial’ aktivlıq belän demenśiyä riskına bäyle xäzerge êşçänleklär analizlana. Anda kimendä 3 yıl buyınça küzätelgän häm bu waqıt êçendä demenśiyä kiçermägän 2 millionnan artıq keşeneñ mäğ’lümatları qarala. Alar 38 törle êşçänlektä qatnaşqan.

Buş waqıtnı törle şöğıl’lär belän kiçerüçe keşelärdä demenśiyä yanawı başqalarınnan urtaça 17%qa az buluı açıqlana.

Uqu, yazu, radio tıñlaw, muzıka qoralında uynaw yäisä kömp’yuter qullanu şikelle aqıl aktivlığı belän mäşğul’ keşelärdä älege çir 23%qa azraq oçrıy. Yörü, yögerü, yözü, yoga yäisä sport belän şöğıl’länüçelärdä ul 17%qa kim. Sośial’ klublar häm volontyer proyektlarında qatnaşu, ğailä häm duslarğa qunaqqa baru, dini êşçänlek alıp baru şikelle sośial’ aktivlıq ta demenśiyä riskın 7%qa azayta.  

Tikşerenüçelärneñ berse - Pekin universitetı xastaxanäsennän Lin Lu êşçänlekneñ buş waqıtta ni belän bulsa da şöğıl’länüneñ aqıl zäğıyf’länüe yanawın kimetä aluın kürsätüen äytä. Ul kiläçäktä bu mäs’älädä tağın da kiñ külämle häm ozaq waqıtlı tikşerenülär ütkärelüe kiräklegen söyli.