Su basular 500dän artıq ğomerne özde

Nigeriyada may ayınnan birle däwam itüçe yawım-töşemnär kiterep çığarğan su basu afätendä 500dän artıq keşeneñ ğomere özelde.

Gumanitar êşlär, afät idaräse häm sośial’ üseş ministrlığı ğomum särqatibe Nasir Sani-Gvarzo taşqınnarnıñ başqala Abudjadan tış 31 töbäktä cimereklär kiterep çığaruın, il külämendä 1 million 411 meñ keşeneñ zarar kürüen belderde.

“Su basularda 1546 keşe yaralandı. 44 meñ 99 yort öleşçä zarar kürde häm 45 meñ 249 öy tulısınça cimerelde. 146 meñ gektardan artıq basu da su astında qaldı,”-dip söyläde Sani-Gvarzo. Ul xökümätneñ su basular säbäple cirennän kitärgä mäcbür bulğan 315 meñ keşegä gumanitar yärdäm cibärüen äytte.

Xalıqara valyuta fondı Nigeriyadağı qayber töbäklärdä soñğı waqıtlarda bulğan su basu hälakäteneñ azıq-tölek iminsezlegen arttıracağı häm il külämendä azıq-tölek bäyälärendä tağın da kübräk qıymmätlänügä kiteräçäge turında kisätte.

Klimat üzgärü häm êkologiyä belgeçläre ildä 53 million keşeneñ su basu yanawı belän oçraşa alacağı turında farazlıy.