İzrail ber ğaräp awılın 207nçe tapqır cimerde

İzrail köçläre Näcäf çülendä fälästinle bädävilär yäşi torğan Arakib awılın tağın ber qat cimerep bik küp keşene öysez qaldıqdı. Bu xaqta Arakibnı saqlaw komitetı äğ’zası Aziz ät-Turi citkerde. Ul İzrail köçläreneñ älege awılnı 207nçe tapqır cimerüen äytä.  

Turi assızıqlağança, cirlektä yäşäwçelär monnan aldağı oçraqlardağı şikelle ük yortların qabat töziyäçäk.

İzrailneñ Arakib awılın berençe cimerüe 2010nçı yılnıñ iyülendä bulğan ide. Anda 80nän artıq fälästinle yäşi. Alar İzrail watandaşı sanala.

Tel-Aviv idaräse awılnıñ qanunsız yullar belän tözelüen häm cimerelergä tiyeşlegen söyli. Anda yäşäwçelär isä bu cirlärneñ İzrail barlıqqa kilgängä qadär bik küp yıllar êlek üzlärenä miras itep ata-babalarınnan qaluın äytä.

Awıl xalqı İzrail köçläreneñ kilep här cimerep kitüennän soñ ağaç häm plastik äyberlärdän öylären qabat tözep qarşılıqların däwam itä.

İzrail xökümäte, Näcäf regionındağı başqa awıllardağı şikelle ük, Arakibqa êlektr häm su şikelle mäcbüri xezmätlärne kürsätmi. Anda yäşäwçe fälästinlelärneñ cirgä milek xoquqın da tanımıy.

Fälästin çığanaqlarına qarağanda, Tel-Aviv idaräśe bigengä qadär 220 meñ fälästinle yäşi torğan 1 million 200 meñ gektar zurlığındağı Näcäf çüleneñ 1 million 100 meñ gektarın tartıp aldı.