"Qırım xalqına süzem: kiläçäkbez"

Ukraina däwlät başlığı Volodimir Zelenskiy Xar’kov töbägendä Rusiyä köçlärennän kire alınğan İzyum şähärenä bardı. Ul qala şurası binası qarşında Ukraina bayrağın kütärü tantanalarında qatnaştı. Rusiyä belän suğışta ğomere özelüçelär öçen ber minut tın tordılar.

Tantanadan soñ Zelenskiy matbuğat xezmätkärläreneñ sorawlarına cawap birde. Ul Rusiyä 2014nçe yılda qanunsız annekśiyälägän Qırımda yäşäwçelärgä yullama yasadı. Ukraina başlığı andağı xalıqnıñ inde 8 yıl zur faciğa êçendä buluın äytte.

“Minem Qırım xalqına süzem: kiläçäkbez. 8 yıl buyı Rusiyä telekanallarında alıp barılğan propagandanıñ bezneñ öçen ähämiyäte yuq. Çınbarlıqnıñ bezneñ yaqlı buluın beläbez. Bu bezneñ kiläçägebezne añlata. Çönki ul bezneñ cirlärebez häm alar bezneñ keşelärebez. Şuña kürä kiläçäkbez,”-dip söyläde Zelenskiy.

Anadolu Agentlığı Ukraina ilbaşınnan İzyumğa kilgäç nilär xis itüen soradı. “Mondağı küreneş şok yasıy torğan, tik minem öçen tügel. Çönki şundıy uq küreneşne berençe basıp alınğan urınnardan Buçada kürgän idek. Biredä dä şul uq xäl. Yuqqa çığarılğan binalar, üterelgän keşelär. Närsä äytä alam,”-dip cawap birde Zelenskiy.