Greśiyädä ozınborınnar qurqınıç çir tarata

Greśiyädä ozınborınnar aşa yoğa torğan çir - Könbatış Nil virusı arqasında ğomere özelüçelärneñ sanı 14kä citte. İlneñ xalıq sälamätlege oyışmasınnan belderülärençä, yoqtıru häm ülem oçraqları arta bara.

Greśiyädä Könbatış Nil virusın 160 keşe yoqtırğan. Xäzergä qadär alarnıñ 14e ülgän. Awıruçılarnıñ 98endä meningit şikelle üzäk nerv sistemasına yoğıntı yasawçı xastalıqlar barlıqqa kilgän, 62sendä isä ciñelçä simptomnar kürelgän yäisä hiç cizdermiçä uzğan.  

Ğadättä “Kuleks” töre ozınborınnar teşlägändä yoğa torğan virustan saqlanu öçen vakśina yuq. Şuña kürä älege qan êçüçelärdän saqlanırğa kiräk.

Ozınborın teşlägännän soñ inkubaśiyä çorı 2 könnän başlap 14kä qadär bulırğa mömkin. İmmunitetı zäğıyf’ keşelärdä ul 21 köngä citä ala. Virus yoqtıruçılarnıñ yaqınça 80%ında bernindi simptom kürenmi, 20%ında isä temperatura, xälsezlek, küñel bolğanu, baş häm muskul awırtu şikelle bilgelär küzätelä.

Könbatış Nil virusı kübräk Afrika, Awrupa, Yaqın Könçığış, Tön’yaq Amerika häm Könbatış Aziyädä oçrıy.