AQŞnı ber yaqtan su basa, ikençe yaqtan - yanğın tarala

AQŞnıñ Kentukki ştatındağı çiktän tış köçle yawım-töşem häm balçıq taşqınında ülüçelärneñ sanı 37gä citte. Wäqalätlelär yözlärçä keşeneñ äle tabılmawın äytä.

Kentukki gubernatorı Êndi Başir ilneñ iñ fäqıyr’ töbäklärennän bersenä cimergeç täêsir yasağan yañğır sularınıñ 30 santimetr biyeklektän uzuın belderde. Ul köçle cillärneñ başqa yanaw kiterä aluı mäs’äläsendä kisätte.    

AQŞ milli gvardiyä komandirı, general Dêniêl Xokanson yaqınça 400 keşeneñ boralaqlar belän qotqarıluın citkerde. Afät töbägendä 18 meñnän artıq keşe êlektrsız qaldı, kimendä 300e baraklarda sıyındı. Töbäktä küperlär häm yözlärçä öy su astında.

Kaliforniya ştatında isä comğa könennän birle däwam itüçe urman yanğınnarı töbägendä maşina êçendä yanğan ike gäwdä tabılğan.  

Kaliforniyädä bıyılğı utnıñ iñ zurısı buluı belderelä. Yanğın meñnärçä öygä yanıy häm çiktän tış êsselek arqasında taralu qurqınıçı yuğarı.