İyärçen yuqqa çıqtı

NASAnıñ Aynı tikşerü öçen cibärgän yaña iyärçenennän xäbär yuq. Agentlıqnıñ wäkile Sara Freyzer beldergänçä, uzğan könne Cir orbitasınnan uñışlı räweştä çıqqan mikrodulqınlı miç zurlığındağı ğaläm apparatı Kapstoun (CAPSTONE) belän êlemtä urnaştırılmıy. Problemanı çişü öçen qabat bağ’lanışqa kerergä tırışalar. Kapstounnıñ döres orbitağa urnaşuı öçen citärlek külämdä yağulığı buluı belderelä.

Yaqınça 25 kilo awırlığındağı apparat belän êlemtäneñ qayçan özelüe äytelmi, tik problemanıñ Cir orbitasınnan çıqqannan soñ başlanuı farazlana. Anıñ keşelärneñ qabat Ayğa menüe öçen kiräkle mäğ’lümatnı täêmin itüe küzallana ide.

Kapstounnıñ yaqınça 13nçe noyabr’dä Ayğa barıp citüe, kimendä 6 ay orbitada toruı planlaştırılğan.

Raketa 28nçe iyün’dä oçırtıldı.