Sośial’ media aşa möselmannarğa yanağan keşe qulğa alındı

Franśiyädä sośial’ media aşa ilneñ tön’yağındağı ber mäçetkä höcüm oyıştıraçağın äytep yanağan 23 yäş’lek beräwneñ qulğa alınuı belderelde. Cirle matbuğatta çıqqan xäbärlärgä qarağanda, yanaw videosı sişämbe könne internetta tarala. Anda ber yeget Lill-Sud ğıybadätxanäsen töşerep bolay dip söyli: “Bu mäçet. Keçkenä mäçet, tik comğa könnärendä keşe küp kilä. Yaqınça 20 keşene üterüneñ ber yulı bar”. Videoda söyläwçe keşe mäçetneñ qarşında torıp kilüçelärneñ möselman buluına qarayaçağın, barısın üteräçägen häm moña qadär bu çaqlı qararlı bulmawın äytä.  

Lill prokuraturası älege şäxesneñ ber dingä qarawçı törkemne üterü belän yanaw häm terrorçılıq ğamälen propagandalawda ğayepläp açılğan cinayät’ êşe qısalarında qulğa alınuın citkerde. Soraw alu waqıtında ul mäçet cämäğat’çelegenä yanaw süzlären söyläwen qabul itä häm monı isertkeç êçemleklär täêsire astında êşläwen äytä.

Franśiyä êçke êşlär ministrı Jeral’d Darmanin Twitterda Lill şähärendäge mäçetneñ citdi yanawlar ob’yektına äwerelüen häm ğıybadätxanäne poliśiyä sağı astına alu kürsätmäse birüen belderde.

Süz uñayınnan, sośial’ mediadağı videonı küpsanlı möräcäğat’lärdän soñ alıp atalar.