ASEAN illäre “Kovid-19” vakśina sertifikatların tanu mäs’äläsen söyläşte
Kön’yaq-könçığış Aziya millätläre berlege (ASEAN) illäre yaňa tör koronavirus (Kovid-19) vakśina sertifikatlarınıň ike yaqlı bularaq tanıluı mäs’äläsendä kileşte
ASEAN illäreneň sälamätlek saqlaw ministrları yäkşämbe könne İndoneziyanıň Bali şähärendä 15nçe ASEAN Sälamätlek saqlaw ministrları cıyılışı qısalarında oçraştı.
Malayziya Sälamätlek saqlaw ministrı urınbasarı Aaron Ago Dagang ASEAN sälamätlek saqlaw ministrlarınıň problemasız häm ışanıçlı çik ar’yağı säyäxäteneň täêmin itelüe maqsatınnan çığıp “Kovid-19” vakśina sertifikatlarınıň ike yaqlı bularaq tanıluı mäs’äläsendä kileşüneň täêmin itelüen citkerde.
Telgä alınğan şuşı adımnıň ASEAN Universal’ tikşerü mexanizmı yäki Bötendönya sälamätlek saqlaw oyışmasınıň texnik üzençäleklärenä nigezlänep qamilläşterelgän başqa mexanizmnar qullanılıp yasalaçağın belderüçe Dagang: "Çiklärneň problemasız räweştä yaňadan açıluı häm ASEAN illäreneň “Kovid-19” kizüennän qotılu barışın tağın da tizlätü möhim”, - dip äytte.
Singapur sälamätlek saqlaw ministrlığınnan yasalğan belderüdä “Omikron” tübän variantlarınnan buluı bilgelängän 3 yaňa oçraqnıň bilgelänelüe äytelde.
Belderüdä xastalardan ikeseneň “Omikron BA.4” variantın häm qalğannarınıň BA.5 variantın yoqtırtuı citkerelde.
Ministrlıq räsmiläre 3 xastanıň “BA.4” häm “BA.5” variantın yoqtıruın rasladı.
Awrupa xastalıqnı totqarlaw häm kontrol’ üzäge yaqın waqıtta şuşı variantlarnı "borçılu tudıruçı törlär" bularaq klassifikaśiyälägän häm Bötendönya sälamätlek saqlaw oyışması aprel’ ayında “BA.4” häm “BA.5” variantların küzätü isemlegenä östägän ide.
