Yaponiya, Fici häm Palau Pekinnıň Honiara belän kileşüennän borçıla
Yaponiya Tışqı êşlär ministrı Hayaşi Yoşimasa Qıtaynıň Solomon utrawları belän qul quyğan iminlek kileşüenä qarata ileneň Palau häm Fici belän bergä oxşaş borçılularınıň buluın belderde
Qıtaynıň Tın okeanındağı utraw illärennän Solomon utrawları belän uzğan ayda iminlek kileşüenä qul quyğannan soň yapon xökümäte töbäktäge söyläşü diplomatiyasın arttırdı.
Yaponiya Tışqı êşlär ministrı Hayaşi Yoşimasa Könbatış Tın okeanında urnaşqan utraw ile Palauğa säfäre waqıtında İlbaşı Surangel Whipps belän ike yaqlı häm regional’ täräqqıyätlärne söyläşte.
“Kyodo” agentlığı xäbär itkänçä, söyläşü waqıtında Hayaşi belän Whipps "İrekle häm açıq Hind-Tın okeanı" kiň qırlı ike il mönäsäbätläreneň köçäytelüe mäs’äläsendä kileşte.
Hayaşi söyläşüdän soň Palauda oyıştırğan matbuğat oçraşuında: "Qıtay häm Solomon utrawları arasında iminlek xezmättäşlegen üz êçenä alğan kileşüneň töbäk qurqınıçsızlığına citdi külämdä yoğıntı yasıy alaçağına qağılışlı Yaponiyanıň borçıluların citkerdem. Tın okeanındağı utraw illäre dä oxşaş qaraşların bäyan itte”, - dip äytte.
Yaponiya ministrı ileneň regional’ mullıq häm totrıqlılıq maqsatınnan çığıp Amerika Quşma Ştatları, Awstraliya häm Yaňa Zelandiya belän xezmättäşlegen arttıraçağın belderde.
Monnan aldağı könne Fici başqalası Suvağa barğan Hayaşi biredä Fici Baş ministrı häm Tışqı êşlär ministrı Voreqe Bainimarama häm Tın okeanı utrawları forumı ğomum särkätibe Henry Puna belän dä küreşep söyläşkän ide.
Honiaranıň Pekin belän uzğan ayda imzalağan iminlek kileşüe Qıtay köçläreneň utrawda urnaşa aluına häm Qıtay köymäläreneň utrawda tuqtıy aluına mömkinlek birä.
