Avstriyä kanślerı Mäskäwgä säfär yasıy
Karl Nexammer Rusiyä-Ukraina suğışı başlanğannan birle Putin belän qara-qarşı küreşkän täwge awrupalı xökümät başlığı bulaçaq
Avstriyä kanślerı Karl Nexammer Rusiyä däwlät başlığı Vladimir Putin belän oçraşu öçen Mäskäwgä yasayaçaq säfäre mäs’äläsendä Törkiyä liderı Räcäp Tayyip Ärdoğanğa xäbär birüen citkerde. Ul Twitterda Ukraina däwlät başlığı Volodimir Zelenskiy belän kiçä uzğan söyläşüe häm bügen Rusiyägä baruı turında belderü yasadı.
Karl Nexammer anda Avstriyäneñ neytral’ däwlät buluın, tik Rusiyä başlağan suğışqa qarşı Ukraina yanında nıqlı poziśiyädä toruların äytte. “Suğış tuqtatılırğa tiyeş. Gumanitar koridor buldıru, suğış cinayät’lären yaqtırtu öçen utnı tuqtatuğa ixtiyac bar,”-dide ul.
Kanśler Mäskäwgä säfäre turında Awrupa Berlege komissiyäse räise Ursula fon der Leyen häm Awrupa şurası citäkçese Çarl’z Mişel’gä mäğ’lümat citkergän. Monnan tış, ul Törkiyä ilbaşı Räcäp Tayyip Ärdoğan häm Ukraina däwlät başlığı Volodimir Zelenskiy belän telefonnan söyläşep yulçılığı turında xäbär birä.
Nexammer Rusiyä-Ukraina suğışı başlanğan 24nçe fevral’dän birle Putin belän qara-qarşı küreşkän täwge awrupalı xökümät başlığı bulaçaq.
