Rusiyä BMOnıñ Keşe xoquqları şurasınnan çığarıldı

BMO ğomum assambleyası Rusiyäne, Ukrainağa qarşı başlağan suğış  säbäple, Keşe xoquqları şurası äğ’zalığınnan çığardı.

193 äğ’zalı Berläşkän Millätlär Oyışması ğomum assambleyasında 93 däwlät Rusiyäne çığaru öçen tawış birde, 24 il qarşı kilde, 58e isä ikelände.

Ukrainanıñ BMOdağı daimi wäkile Sergiy Kisliśa, tawış birü aldınnan çığış yasap, Keşe xoquqları şurasın Titanik belän çağıştırdı häm anı barı Rusiyäneñ äğ’zalığın tuqtatu belän qotqarıp qalu mömkinlegen söyläde.

Rusiyäneñ BMOdağı daimi wäkile urınbasarı Gennadiy Kuz’min isä BMO äğ’zası illärne bu adımğa qarşı çığarğa çaqırdı. “Bezgä qarata nigezsez ğayepläwlärne kire qağabız,”-dide ul.

BMO Keşe xoquqları şurasınıñ rezolyuśiyäläre kiñäş xarakterında häm mäcbüri yuridik köçkä iyä tügel.