Germaniyada Putinğa qarata cinayät’ êşe

Ğadälät êlekke ministrı Sabine Leutheusser-Şnarrenberger häm êlekke êçke êşlär ministrı Gerhart Baum Putin belän bergä Rusiyäle qayber räsmilärgä qarata xärbi cinayät’ êşeneñ açıluı öçen Federal’ prokuraturağa möräcäğät’ itte.

İke êlekke ministr Berlinda oyıştırğan matbuğat oçraşuında Rusiyä xärbi köçläreneñ Ukrainada yasağan häm xalıqara xoquqqa kürä cinayät’ bulıp sanalğan keşelekkä qarşı iñ citdi cinayätlärne sanap uzdı.

Gerhart Baum, cinayät’ möräcäğäteneñ bik kiñ qırlı häm küp sanda çınbarlıqqa nigezlänüen belderep: "Bolar arasında Çernobıl’ atom êlektrostanśiyasınıñ bombalanuı, Mariupol’däge bala tabu klinikasınıñ bombalanuı häm Buçada tınıç xalıqnıñ üterelüe bar”, - dip äytte.

Xalıqara cinayät’ kodeksına kürä, xalıqara xoquqqa qarşı yasalğan cinayät’lär çit ildä başqarılğan oçraqta da xätta Germaniyada xökem itelü mömkinlegen iskärtep uzuçı Baum bu mäs’älädä Süriyäle yuğarı däräcäle ber küzläw oyışması xezmätkäreneñ xökemgä tartıluın misal itep kiterde.

1978nçe yılda Kanśler Helmut Şmidt kabinetında êçke êşlär ministrı bulğan Baum yözlägän tınıç xalıq ülgän Buçada Rusiyäneñ qaysı xärbi berlegeneñ urnaşqan buluı turında tögäl mäğ’lümatlär buluın citkerde.

2009nçı-2013nçe yıllarda Ğadälät ministrı bulğan Leutheusser-Şnarrenberger da: "Ukrainadağı citdi xärbi cinayät’lärgä iğ’tibarnı yünältü öçen qanuni yullarnı qullanırğa telibez, şuna kürä şuşı adımnı yasarğa buldıq”, - dip äytte.