Rumıniyädä xalıqqa yod preparatları öläşälär
Xalıq Ukrainada atom-töş şartlawı bulaçağınnan şöbhälänä
Rumıniyädä atom-töş suğışınnan qurqıp xalıq uzğan atnalarda daruxanälärdäge yod preparatların satıp alıp beterde. Älege ildä xäzer anı tüläwsez räweştä ğailä tabibları tarataçaq. Bu xaqta Rumıniyä sälamätlek saqlaw ministrı Aleksandru Rafila matbuğatqa belderde.
Ul yod darularınıñ 40 yäş’kä qadärge härkemgä buşlay bireläçägen äytte. Ministr Ukrainadağı suğış häm êlek bulğan Çernobıl’ atom-töş êlektr stanśiyäsendäge şartlawnıñ “urtaq xatiräse”nä sıltama yasap älege preparatlarnı taratunıñ kiräklegen assızıqladı.
Rafila Rusiyä belän Ukraina suğışınıñ Rumıniyä çiklärenä bik yaqın buluın, 1986nçı yıldağı atom-töş şartlawın äle onıtmawların häm xäzerge waqıtta moña oxşaş ixtimallarnıñ barlığın da östäde. Şuña kürä, ministr aldan xalıq sälamätlegen qayğırtıp quyunıñ urınlı ikänen äytte.
Kiläse atnadan başlap Rumıniyä xalqına yod preparatların qullanu öçen centekle mäğ’lümat citkereläçäk. Alarnı il külämendäge 10 meñ ğailä tabibı tarataçaq.
Ukrainada 24nçe fevral’dän birle baruçı suğışta uzğan atnalarda bäreleşlär Çernobıl’ atom-töş stanśiyäse yanında uq buldı. Şunnan soñ rumıniyälelär daruxanälärdä yod qaldırmadı.
