Angliyä Rusiyägä qarata sankśiyälärne betermäyäçäk

Angliyä xökümäte räise Boris Djonson Ukrainağa qarşı başlağan suğış säbäple Rusiyägä qarata kertkän sankśiyälärne utnı tuqtatu täêmin itelsä dä betermäyäçäklären belderde. Ul ministrlar kabinetında uzğan soraw-cawap utırşında çığış yasadı.

Xakimiyättäge konservativ partiyä deputatı Djonni Mersernıñ Ukrainağa tağın da kübräk xärbi yärdäm kürsätergä çaqıruın Boris Djonson yaqladı. Ul xärbi häm saqlanu nisbätennän yärdämne ike tapqır arttırırğa kiräklegen äytte.  

“Monnan tış, dön’yadağı ber genä dustıbız häm berlektäşebezneñ dä sankśiyälärdä kiregä adım yasamawın täêmin itäçäkbez. Çınlıqta, Rusiyä däwlät başlığı Vladimir Putin östendäge iq’tisadi basımnı arttırırğa kiräk häm utnı tuqtattı dip kenä sankśiyälärne beterü döres tügel. Monı uylarğa da kiräkmi,”-dip söyläde Djonson.