Qıtaydağı oçqıç hälakätendä 132 keşeneñ dä ülüe tögäl açıqlandı
Hälakät bulğan urındağı êzläw häm qotqaru komandalıq üzägennän belderülärençä, 123 yulçı häm êkipajdağı 9 xezmätkärneñ berse dä isän tügel
Qıtaynıñ Guansi-Kuang avtonom töbägendä 21nçe martta kilep töşkän yulçı oçqıçındağı 132 keşeneñ ülüe tögäl açıqlandı.
Hälakät bulğan urındağı êzläw häm qotqaru komandalıq üzägennän belderülärençä, 123 yulçı häm êkipajdağı 9 xezmätkärneñ berse dä isän tügel.
Oçqıçnın qara ärcäseneñ urının kürsätüçe êlektron signal cihazı tabılğan, qara ärcäneñ ikençe öleşen äle êzlilär. Anıñ berençese 23nçe martta cimerekleklär arasınnan çıqqan ide. Ärcäne tikşerü öçen başqala Pekinğa cibärdelär. Anda kabinadağı söyläşülär yazıp barılğan.
Hälakät bulğan cirlek Vukou şähären çitendäge Tin awılı qırlarında alıp barıluçı tikşerü êşçänlege qoyıp yawuçı yañğır astında awır şartlarda bara. Anda subtropik klimat. Yaqınça 300 xezmätkär êşçänleklären däwam itä alu öçen cıyıluçı yañğır suların suırtıp torırğa mäcbür.
