Awrupa Berlege NATO belän tağın da yaqınayırğa teli
Bügen Awrupa Berlege tışqı mönäsäbätlär şurasında monıñ belän bäyle dokument qaralaçaq
Awrupa Berlege däwlätläreneñ tışqı êşlär häm saqlanu ministrları atna başında Ukraina häm “strategik kompas” şikelle mäs’älälär xaqında söyläşü öçen cıyıla.
Bügen Bel’giyä başqalası Brüssel’dä Awrupa Berlege tışqı mönäsäbätlär şurası uzaçaq. Anıñ berençe bülemendä berlekkä kerüçe illärneñ tışqı êşlär ministrları çığış yasayaçaq. Şulay uq, alarnıñ saqlanu ministrları belän bergä utırışlar ütkärüe dä planlaştırıla.
Cıyılışlarda Ukraina saqlanu ministrı Oleksiy Reznikovnıñ videokonferenśiyä yulı belän qatnaşıp suğıştağı soñğı wäzğıyät’ xaqında citkerüe kötelä. Moldova tışqı êşlär ministrı Niku Popesku belän dä fiker alışu uzuı mömkin.
Şura cıyılışınıñ Ukraina belän bäyle büleklärendä Awrupa Berlege saqlanu ministrları ilneñ xärbi ixtiyacları turında söyläşäçäk.
Bügen Awrupa Berlege oçraşaçaq sınawlarğa qarşı toru öçen kiläse 5-10 yıldağı çaralarnı êçenä aluçı dokument “strategik kompas” tekstı da qabul iteläçäk. Anı soñınnan 24nçe-25nçe martta Awrupa berlege liderlar sammitında raslaw öçen täq’dim itäçäklär.
Dokumentta Rusiyä belän Ukraina suğışınnan soñ NATO häm Awrupa Berlege arasında köçle xezmättäşlek, säyäsi berlek, oyışqanlıq häm ber-bersen tulılandıru töşençälärenä basım yasala.
