Koronavirus balalarda şikär diabetına kiterä

Ğalimnär koronavirusnıñ balalarda şikär diabetı barlıqqa kilü mömkinlegen arttıra aluın açıqladı.

AQŞnıñ awırularnı kontrol’dä totu häm profilaktikalaw üzäge belgeçläre 2020nçe yılnıñ martınnan 2021nçe yılnıñ iyünenä qadär çorda Kovid-19nıñ diabetqa täêsiren tikşerde. Näticädä koronavirus êläktergän balalarda şikär awırtuı barlıqqa kilü ixtimalınıñ tağın da yuğarı buluı kürende. Bu Kovid-19nıñ insulin çığaruçı küzänäklärgä zarar birüe belän bäyle.  

Miçigan universitetınıñ balalar xastaxanäsennän belgeç tabib İnas Tomas üz qul astında koronavirustan däwalanğan balalarnıñ 30%ında 1nçe tip diabet barlıqqa kilüen äytte.  

San-Diyegodağı Rêdi balalar xastaxanäsendä isä pandemiyäneñ berençe yılında, annan aldağı yıl belän çağıştırğanda, şikär diabetı oçraqlarınıñ yaqınça 60%qa artuın belderdelär.

Tikşerenü Kovid-19ğa qadär dä diabetlı bulğan balalarnıñ xäleneñ tağın da naçaraya aluın kürsätte.

1nçe tip diabet aşqazanı astı bizeneñ insulin citeşterüne tuqtatuı yäisä aqrınaytuı näticäsendä barlıqqa kilä.