Bar dön'ya Rusiyäne ğayepli

NATO häm Awrupa Berlege Rusiyä Ukrainağa başlatqan xärbi qatışunı ğayepläde.

NATO ğomüm särqätibe Yens Stoltenberg Rusiyä Donbassqa xärbi operaŝiya başlatqannan soñ açıqlaw yasadı.

“Rusiyäneñ Ukrainağa cawapsız häm säbäpsez höcümen qırıs räweştä ğayeplim. Rusiyä kisätülärgä häm diplomatiya çaqırularına qaramastan tağın ber tapqır möstäqıyl’ häm bäysez ber ilgä höcüm itü yulın sayladı. Bu xalıqara xoquqnı citdi räweştä boza häm Awrupa-Atlantik iminlegenä yanıy. NATO barlıq berlektäşlärne saqlaw häm yaqlaw öçen kiräkle närsälärne başqaraçaq,” – dide ul.

Awrupa Berlege Komissiyase başlığı Ursula fon der Lyayen, Awrupa Berlege Şurası başlığı Çarl’z Mişel’, Awrupa Parlamentı başlığı Roberta Metsola häm Awrupa Berlegeneñ Tışqı mönäsäbätlär häm iminlek säyäsäte yuğarı wäkile Jozep Borrel’ da mäs’älä belän bäyle bularaq urtaq açıqlaw yasadı.

Amerika Quşma Ştatlarınıñ N’yu-York şähärendä Ukraina tışqı êşlär ministrı Dmitro Kulebanıñ taläbe belän ikençe tapqır cıyılğan Berläşkän Millätlär Oyışması İminlek şurası äğzaläreneñ kübese xärbi qatışunı ğayepläde.

Awrupa İminlek häm xezmätäşlek oyışması AGİT ta Rusiyä Ukrainağa başlatqan xärbi operaŝiyane qırıs räweştä ğayepläde.

Amerika Quşma Ştatları ilbaşı Djo Bayden: “Bu höcüm alıp kiläçäk ülem häm cimerüneñ berdänber cawaplısı – Rusiyä. Putin qayğı-xäsrät alıp kiläçäk suğışnı sayladı. AQŞ häm berlketäşläre berlek häm täwäkkällek belän cawap qaytaraçaq,” – dide.

Şulay uq Niderland prem’yer-ministrı Mark Rutte, Germaniya Kanŝlerı Olaf Şol’ŝ,  Angliya prem’yerı Boris Djonson, Angliyaneñ tışqı êşlär ministrı Liz Tras, Franŝiya ilbaşı Êmmanuêl' Makron, İtaliya prem’yer-ministrı Mario Dragi, İtaliya tışqı êşlär ministrı Luidji Di Mayo, Vengriyaneñ tışqı êşlär häm tışqı säwdä ministrı Jiyarto Peter, Awstriya prem’yer-ministrı Karl Nexammer, Çexiya xökümät räise Petr Fiala, Yaponiya prem’yer-ministrı Kişida Fumio, Bolgariya ilbaşı Rumen Radev häm prem’yer-ministrı Kiril Petkov, Gruziya däwlät başlığı Salome Zurabişvili, Gruziya xökümät räise İrakli Garibaşvili, Awstraliya prem’yer-ministrı Skot Morrison Rusiyägä qırıs reakŝiya belderde.