Zelenskiy: “Berkemgä berni birmäyäçäkbez"

Ukraina däwlät başlığı Vladimir Zelenskiy Mäskäwneñ separatist idarälärne tanu qararınnan soñ sośial’ media aşa xalıqqa möräcäğat’ itte. Ul Rusiyäneñ soñğı ğamälläreneñ Ukrainanıñ suverenlığı häm cir bötenlegen bozuın äytte. “Bu qararlarğa bäyle barlıq näticälärneñ cawaplılığı Rusiyä östendä,”-dide däwlät başlığı.

Zelenskiy separatistlarnı tanunıñ ber’yaqlı bularaq Minsk kileşülärennän çığu häm Mormandiyä formatındağı barlıq qararlarnı sanğa suqmaw bularaq añlaşılaçağın belderep, bu adımnıñ tınıçlıq öçen tırışularnı yuqqa çığaruın äytte.

Ukraina liderı citkergänçä, birelgän häm bireläçäk qararlar belän Rusiyä Donbassta 2014nçe yıldan birle bulğan ğaskärlären qanunlaştıraçaq. Ul Normandiyä dürtlese sammitı öçen aşığıç çaqıru yasawların da äytte. Zelenskiy partnyerlarınnan nıqlı häm täêsirle adımnar kötülärenä iğ’tibarnı cälep itte.

Ukraina başlığı çiklärneñ yaxşı saqlanuın xäterlätte, üz cirlärendä buluların häm bernidän dä qurıqmawların söyläde. Zelenskiy berkemgä bernindi burıçları bulmawın citkerep bolay dide: “Berkemgä berni birmäyäçäkbez. Moña imanıbız kamil. Çönki bu 2014nçe yılnıñ fevrale tügel, 2022neñ fevrale. Başqa däwlät, başqa armiyä. Berdänber maqsatıbız – Ukrainada tınıçlıq”.

Zelenskiy ileneñ säyäsi-diplomatik çişeleş yaqlı buluın da xäterlätte.

Rusiyä däwlät başlığı Vladimir Putin kiçä kiç Doneśk häm Lugansk töbäkläreneñ bäysezlegen tanuçı qararnı imzaladı.