Afrikada 6 ay êçendä 20 millionnan artıq keşe gumanitar yärdämgä moxtac bulaçaq
Bu xaqta YUNİSEF kisätä
Berläşkän Millätlär Oyışmasınıň Balalarğa yärdäm itü fondı YUNİSEF xäbär itkänçä, Afrikada 6 ay êçendä 20 millionnan artıq keşegä aşığıç azıq-tölek häm su yärdäme kiräk bulaçaq.
YUNİSEFnıň Könçığış häm Kön’yaq Afrika regional’ direktorı Möxämmäd Malik Fall jurnalistlarğa Êritreya, Êfiopiya, Keniya, Somalida gumanitar krizis köçäyä baruı turında söyläde häm älege illärdä 6 ay êçendä 20 millionnan artıq keşeneň gumanitar yärdämgä moxtac bulaçağın iskärtte.
Fall töbäktä soňğı 40 yıldağı iň qorı çor küzätelüen, klimat üzgäreşenä bäyle qorılıqnıň su citmäwgä kiterüen häm bu säbäptän xaywannarnıň ülüen dä assızıqladı.
YUNİSEFnıň Könçığış häm Kön’yaq Afrika regional’ direktorı Möxämmäd Malik Fall bilgeläp ütkänçä, keşelär qorılıq arqasında küçenä, azıq-tölek citmi häm êpidemiya awıruları tarala, bu xäl balalarğa ayıruça tiskäre yoğıntı yasy.
Êritreya, Êfiopiya, Keniya häm Somalidağı qorılıq arqasında 5 million yarım bala citärlek däräcädä tuqlana almıy.
Fall äytüençä, 3 ay êçendä yaňğır bulmasa bu san ikelätä artaçaq.