AQŞ Süriyädä operaśiyä oyıştırdı: 13 keşe üterelde
Hälaq buluçılar arasında balalar häm xatın-qızlar da bar
Amerika Quşma Ştatları ğaskärläre Süriyäneñ İblib töbägendä xärbi operaśiyä oyıştırdı. Anda balalar häm xatın-qızlarnı da kertep 13 keşe hälaq buldı.
Operaśiyä AQŞnıñ F-16 oçqıçı häm ber boralaq yärdämendä uzdırıla. Ul Törkiyä waqıtı belän tönge säğat’ 1nçe yartıda başlana.
AQŞ ğaskärläre açqan utta şaqtıy yort zarar kürä. Cimereklär arasında êzläw-qotqaru êşläre alıp baruçı grajdanlı törkemnär 13 keşeneñ üle gäwdäsen taba: alarnıñ 6sı bala, 4se xatın-qız.
Cirlektäge çığanaqlar AQŞ xärbiläreneñ DEAŞ terrorçı oyışmasınıñ iñ nıq êzlängän atamannarınıñ bersenä qarşı operaśiyä oyıştıruın farazlıy.
Pentagon süzçese Djon Kirbi bu mäs’älä turında belderü yasap operaśiyäneñ uñışlı uzuın citkerde. Anıñ äytüençä, AQŞ tarafında yuğaltular yuq. Tağın da tulıraq mäğ’lümatnıñ soñınnan xäbär iteläçäge dä citkerelde. Süzçe kemgä höcüm oyıştırıluı turında äytmäde.
AQŞ 2019nçı yılnıñ oktyabr’ ayında da İdlibtä oxşaş ber operaśiyä uzdırğannan soñ DEAŞ terrorçı oyışmasınıñ başlığı Äbubäker äl-Bağdadinıñ üterelüen citkergän ide.
