Awrupağa qaçıp kerüçelär arta

Awrupa Berlege çiklärenä 2021nçe yılda qanunsız räweştä kerüçelärneñ sanı, annan aldağı yıl belän çağıştıranda, 57%qa artıp 195 meñ buldı.

Çik buyı iminlege agentlıı Frontexnıñ mäğ’lümatlarına qarağanda, Awrupa Berlege illärenä qaçaq yullar belän kerülär, säyäxät çikläwläre yomşaruğa, Kovid-19 kizüennän aldağı däräcägä citte. Andıylarnıñ sanı 2020nçe yıl belän çağıştırğanda 57%qa, 2019ğa qarağanda – 36%qa arttı.

Uzğan yıl qanunsız ütep kerü öçen iñ yış qullanılğan marşrut Urta diñgez bula. Anıñ aşa Awrupa Berlege illärenä 65 meñnän artıq keşe qaçıp kilgän. Urta diñgezdän kilüçelär, 2020nçe yılğa qarağanda, 83%qa arttı.

Könbatış Urta diñgez regionınnan kerüçelär dä 6%qa kübäyep 18 meñ tiräse buldı.

Könçığış Awrupadan, bigräk tä Belarus’tan, Awrupa Berlege illärenä kerülär isä 1000%qa arttı häm yaqınça 8 meñ keşe täşkil itte.

Awrupa Berlege çikläre aşa qanunsız ütüçelärneñ kübese süriyälelär. Annan soñ Tunis, Marokko, Aljir häm Äfğanstan watandaşları kilä.