Meksika Assanjqa säyäsi sıyınu birergä teli

Meksika däwlät başlığı Andres Manuêl’ Lopes Obrador Amerika Quşma Ştatlarında şımçılıqta ğayeplänüçe WikiLeaks avtorı Julian Assanjğa säyäsi sıyınu xoquqı birergä teläwen belderde. Ul matbuğat cıyılışında älege şäxesneñ Meksika öçen yanaw bulmawın, säyäsi sıyınu täq’dimen qardäşlek häm yärdämläşü maqsatı belän yasawların äytte.

Obrador äytüençä, ul AQŞnıñ êlekkege ilbaşı Donal’d Tramp idaräsenä Assanjnı kiçerergä çaqırıp xat yazğan, tik cawap kilmägän.

Amerika Quşma Ştatları 50 yäş’lek Assanjnı Äfğanstan häm Ğıyraq suğışları belän bäyle yözlärçä meñ urlanğan dokumentnı bastırğannan soñ “milli saqlanu mäğ’lümatların qulğa töşerü” häm “faş itü öçen süz quyışu”da ğayepläde. Assanj başta Êkvador, annarı Angliyägä sıyındı. Ul 2019nçı yıldan birle AQŞnıñ ğayepläwläre häm kire tapşırılu taläbe säbäple, bernindi xökem qararı çığarılmağan kileş, Londondağı yuğarı saq astındağı Belmarş törmäsendä totıla.

Ägär Assanjnı AQŞqa tapşırsalar, anıñ kimendä 136 yılğa räşätkä artına xökem iteläçäge belderelä.