Bayden Awrupa liderları belän Ukraina turında söyläşte
Bu Rusiyä däwlät başlığı Vladimir Putin belän ütkäreläçäk videokonferenśiyä aldınnan fiker tuplaw buldı
Amerika Quşma Ştatları ilbaşı Djo Bayden Rusiyä däwlät başlığı Vladimir Putin belän ütkäreläçäk videokonferenśiyä aldınnan Franśiya, Germaniya, İtaliya häm Böyekbritaniyä liderları belän Ukraina turında fiker alıştı.
Aq Yorttan yasalğan yazmaça belderügä qarağanda, Bayden Franśiyä ilbaşı Êmmanuel’ Makron, Germaniyä kanślerı Angela Merkel’, İtaliyä xökümäte räise Mario Dragi häm Böyekbritaniyä prem’yerı Boris Djonson belän telefon aşa söyläşü uzdırdı. Liderlar Rusiyäneñ Ukraina çigendä ğaskärlären arttıruına häm könnän-kön kiskenläşkän söylämnärenä borçıluların belderde.
Rusiyäne kiyerenkelekne kimetergä çaqıruçı liderlar, bigräk tä, Normandiyä formatı aradaşçılığında alıp barılaçaq diplomatiyäneñ Donbasstağı problemanı Minsk kileşüe yulı belän çişü öçen berdänber ısul buluın assızıqlıy. Alar Ukrainanıñ suverenlığı häm cir bötenlegenä teläktäşleklären belderde, mäs’älägä urtaq poziśiyäne saqlaw öçen êlemtädä qalırğa kileşte.
