Stoltenberg Rusiyäne Ukraina mäs’äläsendä kisätte
NATO Ğomum särkätibe Yens Stoltenberg Rusiyäneñ Ukraina çigendäge xärbi êşçänlegen borçılıp küzätülären belderep: "Rusiyäneñ Ukrainağa qarşı teläsä qaysı agressiyäneñ bäyäse, säyäsi häm iq’tisadi näticäläre bulaçaq”, - dip äytte
Stoltenberg bügen häm irtägä NATO tışqı êşlär ministrları cıyılışı uzaçaq Latviya başqalası Rigada Latviya İlbaşı Egils Levits belän düşämbe könne urtaq matbuğat oçraşuın ütkärde.
İke könlek cıyılışta Rusiyäneñ Ukraina çigendäge xärbi küäten arttırunıñ häm Belarustan Pol’şağa, Latviyağa häm Litvağa baru öçen çik buyına kitkän keşelär belän bäyle wazğiyätneñ dä söyläşeläçägen citkerüçe Stoltenberg Belarus citäkçelegeneñ migrantlarnı yawız niyätlärdä qullanuın häm monıñ regional’ totrıqlılıqqa zarar birüen äytte.
Ukraina-Rusiyä çigendäge wazğiyätne dä yaqınnan häm borçılu belän küzätülären iskärtep uzuçı Stoltenberg: "Rusiyä bıyıl ikençe tapqır kiñ qolaçlı häm ğadäti bulmağan räweştä köçlären töbäktä cıydı. Biredä awır qorallar, artilleriya, çılbırlı texnika, keşesez hawa apparatları häm êlektron xärbi sistemaları belän suğışqa äzer meñlägän soldatnı küräbez. Bu xärbi küät säbäpsez häm añlatma birelmägän räweştä biredä. Bu wazğiyät kiyerenkelekne arttıra, yalğış isäpläwlärneñ yasalu ixtimalın kübäytä. Rusiyäneñ Ukrainağa qarşı teläsä qaysı agressiyäneñ bäyäse, säyäsi häm iq’tisadi näticäläre bulaçaq. Rusiyä ütä kürenmäle bulırğa, kiyerenkelekne kimetergä tiyeş”, - dip belderde.
Stoltenberg “Baltıyq töbägendä NATO kontinentınıñ arttırıluına qağılışlı plannar barmı, yuqmı?” digän sorawğa “Rusiyäneñ 2014nçe yılda Qırımnı qanunsız räweştä annekśiyäläwennän soñ NATO töbäktäge barlığın arttırdı”, - dip cawap birde.
"Salqın suğış betkännän birle kümäk saqlawıbıznıñ iñ zur östämäsen soñğı yıllarda yasadıq”, - dip äytüçe Stoltenberg NATO cawap birü köçeneñ zurlığın öç märtäbä arttırıp, 40 meñ ğaskärigä citkerülären, bu köçneñ zarur bulğan çaqta qısqa waqıt êçendä cibärelä alınuın iskärtep uzdı.
Yens Stoltenberg NATO tışqı êşlär ministrları cıyılışında Rusiyädän tış ittifaqnıñ kiläse yılda İspaniyada ütkäreläçäk NATO sammitında qabul itelüe planlaştırılğan yaña strategik konśepśiyanıñ da söyläşeläçägen belderde.
NATOnıñ Tön’yaq Amerika häm Awrupanıñ ittifaqı buluın iskä töşerüçe Stoltenberg läkin töbäkneñ global’ yanawlar häm sınawlar aldında toruın, Qıtaynıñ kütärelüe belän global’ köç tigezlegeneñ üzgärüen, böten bolarnıñ yaña strategik konśepśiyası dokumentına kertelüeneñ zarurlığına basım yasadı.
