Barselonada 4 keşe yanıp ülde

İspaniyäneñ Barselona şähärendä Paqıstannan kilgän 8 yört-cirsez möhacir sıyınğan binada yanğın çıqtı. Anda ber ük ğailädän 4 keşeneñ ğomere özelde, 2se bala.

Barselona xakimiyäte häm yanğın sünderü idaräsennän yasalğan belderügä qarağanda, şähär üzägendäge Tetuan mäydanındağı binada ut çığu turında xäbär cirle waqıt beläñ irtänge säğat’ 6larda kilä. Qotqaruçılar waqıyğa urınında 4 keşeneñ üle gäwdäsen taba, ciñelçä zarar kürgän tağın 4 keşene qotqaralar.

Açıqlanğança, bina êlekkege bank ofisınıqı, anıñ kereş qatına 8 möhacir kerep yäşi başlağan.  

Yanğında ülgän Paqıstan ğailäseneñ balaları 1 häm 3 yäş’lärendä bula.

Cirle wäqalätlelär yanğın çıqqan bina qarşında tönge säğat’ 3lärdä möhacirlär arasında ğawğa buluın, poliśiyäneñ waqıyğa urınına barıp alarnı ayıruın belderde. Yanğınnıñ ut törtü arqasında çığuınnan da şöbhälänälär.

Waqıyğa urınına Barselona mêrı Ada Kolau da bardı. Ul matbuğatqa beldergänçä, binada yort-cirsez migrant ğailä yäşäwen belgännär häm älegä qadär alarğa azıq-tölek yärdäme kürsätelgän.

Bıyıl Barselonada ülem belän tögällängän 5 yanğın bulğan. Soñğısı sentyabr’dä, şulay uq, migrantlar sıyınğan iske binada çığa, anda 1 xatın-qız hälaq bula.

Barselonada 4 meñ 800gä yaqın yort-cirsez bar. Alarnıñ 1064e uramda yäşi.