Muzıka festivalendä taptalıp üldelär
AQŞnıñ X'yuston şähärendä uzğan muzıka festivalendä êteş-törteştä ülüçelär sanı arttı
AQŞnıñ Texas ştatındağı X’yuston şähärendä 5nçe noyabr’dä uzğan Astroworld muzıka festivalendä êteş-törteş arqasında yaralanğan 9 yäş’lek bala ülde. Şulay itep, älege çarada ğomere özelüçelärneñ sanı 10ğa citte.
Festival’dä awır yaralanğan 9 yäş’lek Êzra Blantnıñ ğailäseneñ advokatı Ben Kramp sabıynıñ Texas balalar xastaxanäsendä küzlären mäñgegä yomuın citkerde. Ul ulların yuğaltqan ata-ananıñ ärnüen belderep, konśertqa barunıñ näticäse mondıy bulmasqa tiyeşlegen äytep uzdı. 9 yäş’lek Blant êteş-törteştä ülüçelärneñ iñ keçkenäse. Ätise Treston Blant ulın festival’dä cilkäsenä utırtıp yörtkän, tik xalıqnıñ tığızlanuı arqasında kilep çıqqan taptawda añın yuğaltqan. Añına kilgändä isä balasınıñ yanında bulmawın kürä. Anı awır yaralı xäldä xastaxanädä tabıp alalar.
Festival’dä êteş-törteş rêpçı Trêvis Skott çığış yasağan waqıtta kilep çığa. Anda 8 keşe ülä, yözlärçäse yaralana. Awır xäldäge ber keşe 11nçe noyabr’dä xastaxanädä can birde. Waqıyğada ğomere özelüçelärneñ yäş’läre 9dan 27gä qadär.
Skott êteş-törteştän soñ yasağan belderüendä qorbannarnıñ ğailälärenä yärdäm itärgä tırışuın äytte.
Konśertta yaralanğan ber keşe Skott belän bergä säxnägä çıqqan cırçı Dreyknı xalıqnı qotırtuda ğayepläde häm 1 million dollarlıq kompensaśiyä taläp itep mäxkämägä birde.
