Ğalämdä qunaqxanä bulaçaq
Milliarder Djeff Bezosnıñ şirkäte ğaläm plannarı belän urtaqlaştı
Amerika milliarderı Djeff Bezosnıñ ğaläm turizm şirkäte “Blue Origin” ğaläm stanśiyäse tözü plannarı barlığın belderde. Anıñ 10 yıl êçendä xezmät kürsätä başlayaçağı uylanıla. Şirkät idaräçeläre täq’dim itkän tanıtu materiallarında stanśiyäneñ ğalämdä küp funkśiyäle êş parkı bulaçağı häm ber’yulı 10 keşene qabul itä aluı citkerelä.
Şirkät "Orbital Reef" dip ataluçı älege stanśiyäne tözü öçen “Sierra Space” häm “Boeing” belän xezmättäşlek itäçäk.
“Blue Origin” wäqalätleläre äytüençä, 32 meñ kvadrat metrlı ğaläm stanśiyäse mikrogravitaśiyada fil’m töşerü yäisä iñ soñğı texnologiyälär belän tikşerenülär ütkärü öçen ideal’ urın bulaçaq. Monnan tış, anda ğaläm qunaqxanäse dä yasalaçaq.
Proyektnıñ küpmegä töşäçäge turında belderü yasalmadı. Djeff Bezos bu êş öçen yılına 1 milliard dollar bülep birergä ışandırdı.
Xalıqara ğaläm stanśyäseneñ qullanu waqıtı 2030nçı yılğa qadär bulsa da, xäzerge waqıtta bik küp problemaları bar. Rusiyä wäqalätleläre andağı iske cihazlarnıñ zur hälakät kiterep çığara aluınnan qurqa . İl üz kosmonavtların 2025nçe yılğa qadär stanśiyädän qaytarırğa uylıy.
