Törmägä tank belän kerdelär

Êkvadorda 29nçı sentyabr’dä törmädä bandalar arasında çıqqan bäreleştä 118 keşeneñ ülüennän soñ kontrol’ne täêmin itü öçen poliśiya häm xärbi berleklär kiñ külämle operaśiya başladı.

Cirle matbuğatta çıqqan xäbärlärgä qarağanda, Guayakil’ şähärendäge Litoral’ törmäsenä tanklar kerä, 8nçe bülegendä atu tawışları işetelä. Maxsus berleklär ob’yektqa tawış bombaları qullanıp ütä. Alar belän banditlar arasında bäreleş kilep çığa. Anda ber poliśiya xezmätkäre häm küp sanda mäxküm yaralana.

Êkvador kriminal’ mediśina êkspertizasınnan belderülärençä, ülgän 118 mäxkümneñ barı 41eneñ şäxese açıqlanğan, 21eneñ gäwdäsen ğailälärenä tapşırğannar.

Däwlät başlığı Gil’yermo Lasso 30nçı sentyabr’dä matbuğat cıyılışında ildäge barlıq törmä sistemalarında 60 könlek “ğadättän tış xäl” iğ’lan itelüen beldergän ide.  

Törmälär sisteması ğomum mödire Bolivar Garson zur faciğa buluın belderep: “Oyışqan cinayät’çel törkemnär arasındağı köräş häm räşätkä artındağı köç suğışı, qızanıçqa, bu däräcägä citte. Wäzğıyät’ çınlap ta qurqınıç,”-dide.