Krit utrawında yuğaltular

Greśiyäneñ Krit utrawında düşämbe bulğan häm 1 keşeneñ ülemenä kitergän cir teträwdän soñ 350dän artıq yortnıñ zarar kürüe bilgele buldı. Anda äle haman da cir astınnan selkenülär däwam itä. 300gä yaqın keşe tönne Greśiyä qorallı köçläre qorğan çatırlarda ütkärde.

Greśiyä telekanalı MEGAga interv’yu birgän Afina geodinamika institutı räise Akis Çelendis Kritta iñ zur zarar kürgän awıl Arkaloxorinıñ 15 santimetrğa asqa taba iñüen belderde.

İlneñ asqorma häm transport ministrı urınbasarı Yorgos Karayannis 60 injenerdan toruçı törkemneñ cirlektä tikşerenü uzdıruın, 350dän artıq bina häm 9 mäktäpneñ qullanırğa yaraqsız xäldä buluın açıqlawların citkerde.

Cir teträwdä Arkaloxori awılındağı Profitis İlias çirkäwen tözekländerüçe 62 yäş’lek keşeneñ ğomere özelde.