M'yanmada rizasızlarnıñ üleme arta

M’yanmada xärbi tüntäreleştän birle rizasızlıq belderüçelärgä qorallı qarşılıq kürsätü näticäsendä ülüçelär sanı 880gä citte.

İlneñ säyäsi totqınnarğa yärdäm oyışması xisabına qarağanda, soñğı 24 säğat’tä tağın 3 grajdanlınıñ hälaq buluı raslanğan. İzolyatorlardağı keşe sanı – 5 meñ 104kä citkän. 1965 keşene isä qulğa alu qararı bar.

Şul uq waqıtta, Sagaing töbägendä tüntäreleşkä qarşılar tözegän Xalıq saqlanu köçe belän M’yanma armiyäse arasında 22nçe iyün’nän birle baruçı bäreleşlärdä kimendä 20 ğaskärineñ üterelüe alğa sörelä.

Xalıq saqlanu köçeneñ isemen äytergä telämägän ber äğ’zası “Myanmar Now” gazetına interv’yu birde häm töbäktäge ike rayonda armiyäneñ 3 kön buyı awır qorallar belän gtajdanlılarğa höcüm itüen belderde.  

BMO M’yanmada armiyä belän bäreleşlär arqasında torğan cirlären taşlap kitüçelärneñ sanınıñ 230 meñgä citüen äytä. Barı tik Karen töbägendä 177 meñ tiräse keşe öyennän çığıp tawlar häm urmannarğa qaçqan. 20 meñ grajdanlı Hindstan çigendäge töbäklärgä sıyınğan.