88 yıllıq täñkä rekord bäyägä satıldı

Amerika Quşma Ştatlarında 1933nçe yılda bastırılğan täñkä öçen 19 million 900 meñ dollar birdelär.  Anı N’yu-Yorktağı aukśionda satuğa çığaralar.

“İke börket” dip ataluçı altın aqça rekord bäyägä şäxese äytelmägän ber keşegä kitä.  Ber yağında Bäysezlek häykäle, ikençesendä – oçuçı börket sürätlängän täñkä 1933nçe yılda basılğannan soñ berqayçan da äyläneşkä kermägän.

Amerikalı wäqalätlelär ul çordağı AQŞ ilbaşı Franklin Ruzvel’t kürsätmäse belän altın standartı sistemasınnan çığa häm “İke börket” aqçalarınıñ barısı diyärlek yuq itelä. Qalğan täñkälärdän ike danäse ber muzeyğa cibärelä.

Rekord bäyägä satılğan aqça küpmeder waqıt Misır patşası Farukta saqlana. Soñınnan ul N’yu-Yorkta yäşeren xezmät operaśiyäsendä qulğa töşerelä.