Könbatışta koronavirus: soñğı sannar
Könbatış illärendä Kovid-19 belän bäyle soñğı wäzğıyät'
Dön’yada koronavirus arqasında ğomere özelüçelär sanı 2 million 508 meñ 940tan arttı. Virusnı yoqtıruçılar 113 million 101 meñ, sawığuçılar isä 88 million 723 meñnän kübräk.
AQŞta koronavirus arqasında 518 meñ 363 keşe yaqtı dön’yadan kitte. İldä älege çirne yoqtıruçılar sanı isä 28 million 974 meñ 620dän kübräk. Kaliforniya ştatında koronavirusnıñ tağın da yoğışlı häm xätär töreneñ açıqlanuı alğa sörelde. AQŞnıñ daru firmaları “Pfayzer”, “Moderna”, “Djonson häm Djonson” mart axırına qadär 240 million doza Kovid-19 vakśinası belän täêmin itäçägenä ışandırdı. AQŞ xökümäte 5 ayırım farmaśevtika şirkäte belän yaqınça 600 million keşegä citärlek vakśina öçen kileşü imzalağan ide.
Angliyädä koronavirus säbäple soñğı 24 säğat’tä 442 ülem terkälde, yoqtıruçılar isä 9 meñ 938gä arttı. İldä ğomere özelüçelär xäzer 121 meñ 747, awıruçılar 4 million 144 meñ 577 buldı.
İtaliyädä kizüdän soñğı 24 säğat’tä 318 keşeneñ ğomere özelde häm ülüçelär sanı 96 meñ 666ğa citte. Virusnı yoqtıruçılar sanı isä ber täwlektä 16 meñ 424kä arttı häm 2 million 848 meñ 564 keşe täşkil itte.
Franśiyädä Kovid-19 arqasında soñğı 24 säğat’tä 277 keşeneñ ğomere özelde häm ülüçelär sanı 82 meñ 321 buldı. Ber köndä terkälgän 31 meñ 519 yaña yoqtıru oçrağı belän koronavirus diagnozı quyılğan keşe sanı 3 million 661 meñ 410ğa citte. Franśiyädä kizüneñ ikençe dulqınında test näticäläre pozitiv çıqqan, ämma awıru bilgeläre bulmağan qayber mediśina xezmätkärläreneñ keşe citmäw arqasında häm premiyä öçen êşläwlären däwam itüläre xaqında süzlär yöri.
İspaniyädä Kovid-19dan soñğı 24 säğat’tä 389 keşeneñ ğomere özelde. Şulay itep, ildä älege çirdän ülüçelär sanı 68 meñ 468gä citte. Ber kön êçendä 9 meñ 212 yaña oçraq terkälde häm awıruçılar sanı 3 million 170 meñ 644kä citte.
Portugaliyädä koronavirustan 16 meñ 136 keşe ülde, yoqtıruçılar sanı 800 meñ 586ğa citte.
Kolumbiyädä Kovid-19 arqasında 59 meñ 260 keşe yaqtı dön’yadan kitte. İldä AstraZeneka yasağan vakśinanı qullanu öçen aşığıç röxsät birelde. Bu Kolumbiyädä äyläneşkä kergän öçençe preparat buldı. Monnan alda “Sinovak” häm “Pfayzer/ BionTex”nıñ vakśinaları da röxsät itelgän ide.
