Törek quşamatlı Argentina säyäsätçese wafat

Argentina belän 1989nçı-1999nçı yıllarda idarä itkän êlekkege däwlät başlığı häm senator Karlos Saul Menem wafat. Aña 90 yäş’ ide. Menem uzğan yılnıñ 15nçe dekabrendä bäwel yulı infekśiyäse yoqtırıp salınğan xastaxanädä can birä.

Bu xaqta Argentina däwlät başlığı Al’berto Fernandes Twitterında yazdı. “Karlos Saul’ Menemneñ üleme öçen tirän qayğı kiçeräm,”-dide ul.

Tamırları Süriyädän buluı öçen Menemğa törek mäğ’näsendäge “êl Turko” quşamatı tağıla. Ul Argentinada 1983nçe yılda demokratiya qabat torğızılğannan soñ xakimiyätkä kilgän ikençe däwlät başlığı.

Menemnıñ iseme küp kenä cinayät’ däğ’walarında bar. Ul Êkvador häm Xorvatiyägä qanunsız qoral satuda ğayeplänep 2001nçe yılda qulğa alındı häm 2018nçe yılda xökem waqıtı uzu säbäple aqlandı.

Menem Buênos-Ayresta 1994nçe yılda yähüd cämğıyätenä yasalğan häm 85 keşeneñ ğomeren özgän höcümne tikşerügä tıqşınuda ğayeplände. 2019nçı yılnıñ martında anı aqladılar.

Karlos Saul’ Menemnıñ sälamätlegendä problemalar küp bula. 2020nçe yılnıñ iyünendä anı koronavirusqa oxşağan bilgelär belän xastaxanägä salalar, ämma test negativ çığa.