Awrupa Berlege vakśinalaştıru waqıtın ozayttı

Awrupa Berlege illäre xalıqnıñ 70%ın Kovid-19ğa qarşı vakśinalaştıru waqıtın 21nçe sentyabr’gä qadär ozayttı. Monnan alda älege êşne 1nçe iyün’gä qadär beterergä dip maqsat quyılğan ide.

Awrupa Berlege komissiyäse vakśina belän täêmin itüdä qıyınlıqlar çığu häm kampaniyäneñ äkren baruı säbäple üzgäreşlär kertergä mäcbür  buldı. Komissiyä räise Ursula fon der Leyen bu xaqta Kovid-19 kizüe säbäple äzerlängän qotqaru fondınıñ qabul itelüe belän bäyle imza tantanasınnan soñ belderde.

“Urtaq maqsatıbız bar. Ul – Awrupa Berlegendäge baliğ’ bulğan keşelärneñ 70%ın cäy axırına qadär vakśinalaştıru. Şunısı açıq: cäy 21nçe sentyabr’dä tögällänä,”-dide ul.

Monnan alda komissiyä räise urınbasarı Margaritis Şinas 19nçı ğıynvarda yasağan belderüendä 70% maqsat quyuların häm aña 1nçe iyün’gä qadär ireşergä planlaştıruların citkergän ide.

Awrupa Berlege älegä qadär 6 şirkät belän tulayım 2 milliard 300 millionğa yaqın doza öçen kileşü imzaladı. Ämma preparatlarnı illärgä taratu äkren bara häm bu nisbättän komissiyä tänqıyt’ utına totıla. Şirkätlärneñ täêminat probleması, citeşterü mömkinlekläreneñ arttırıla almawı şikelle säbäplär vakśinalaştırunı totqarlıy.

Fon der Leyen bolay dip aqlandı: “Vakśinalarnı raslawda soñğa qaldıq. Küpläp citeşterü mäs’äläsendä bik optimist qaraşta idek. Monnan tış, birelgän zakazlarnıñ waqıtında äzer bulaçağına ışandıq”.

Awrupa Berlege külämendä vakśinalaştıru 2020nçe yılnıñ dekabr’ axırında başlanğan ide.  Bügengä qadär tulayım 450 million keşeneñ 18 million yarımına preparat qadağannar.