Awrupa Berlege Rusiyädäge qulğa alular öçen ärni
Kiçä mitinglarda 3 meñ 800dän artıq keşe qulğa alına
Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell Rusiyädä oppoziśioner Aleksey Naval’nıynı yaqlap oyıştırılğan mitinglarda meñnärçä keşeneñ qulğa alınuına ärnüen belderde. Diplomatnıñ bu atnada Rusiyägä säfäre kötelä. Ul üzeneñ Twitterında bolay dip yazdı: “Rusiyädä qabat bik küp keşeneñ qulğa alınuı häm protestçılar belän jurnalistlarğa qarata köç qullanıluına küñel ärni”.
Borrell xalıqnıñ basımnan qurıqmıyça rizasızlıq belderü xoquqın qullana aluı kiräklegen belderde häm Rusiyäneñ xalıqara yöklämälärne ütäwen teläde.
Rusiyädä, qatğıy çikläwlärgä qaramastan, kiçä meñnärçä keşe Aleksey Naval’nıynıñ irekkä çığarıluın taläp itep miting oyıştırdı. Poliśiyä kübese liśey uquçısı häm universitet studentı bulğan protestçılarğa qarşılıq kürsätte. Keşe xoquqların yaqlawçı oyışmalarnıñ mäğ’lümatlarına qarağanda, 82 jurnalistnı da kertep 3 meñ 800dän artıq keşe qulğa alına. Aralarında oppoziśionernıñ xatını Yuliya Naval’naya da bar.