Albaniyada protestlar däwam itä
Tiranada ber yeget poliŝiya kisätüen ütämägäne öçen atıp üterelgän ide
Albaniya başqalası Tiranada ber yegetneñ poliŝiya kisätüen ütämägäne öçen atıp üterelüennän soñ başlanğan kiyerenke protestlar kiçä dä däwam itte.
Êçke êşlär ministrlığında başlanğan häm Ministrlar Kabinetında däwam itkän kiyerenke çaralar başqalanıñ qalğan rayonnarına da cäyelde.
Koronavirus kizüe arqasında 10nan artıq keşeneñ cıyıluı tıyılğan çorda 3 kön buyı protestlar oyıştırğan rizasızlıq belderüçelär poliŝiyağa taş häm törle äyberlär ırğıttı.
Poliŝiya xezmätkärläre isä protestçılarnı taratu öçen borıçlı gaz belän cawap qaytardı.
Rizasızlıq belderüçelär êçke êşlär ministrınıñ wazıyfadan kitüennän soñ Albaniya İminlek ğomüm mödireneñ dä wazıyfadan kitüen häm poliŝiya qırıslığınıñ tıyıluın taläp itä.
Albaniya xökümät räise Êdi Rama aldağı könne açıqlaw yasap, êçke êşlär ministrı Sander Leşaynıñ wazıyfadan kitü ğarizasın tapşıruın beldergän ide.
Başqala Tiranada 8 dekabr’ könne uramğa çığarğa tıyılğan sägät’lärdä 25 yäş’lek ber yeget poliŝiyaneñ “tuqta” kisätüen tıñlamıyça qaça başlıy, açılğan utta yaralana häm xastaxanädä yaqtı dön’yadan kitä.
Bu waqıyğağa ildäge säyäsi partiyalär, ictimağıy oyışmalar häm xalıq reakŝiya belderä.
3 kön däwam itüçe protestlarda rizasızlıq belderüçelär belän poliŝiya arasında çıqqan bäreleşlärdä şaqtıy poliŝiya xezmätkäre häm protestçı yaralandı.
