Bıyıl, ğadättägeçä 12 tügel, 13 tulğan ay bulaçaq

 Bıyıl oktyabr’ ayında ğacäyep küreneş kötelä – ike tulğan ay bulaçaq. İkençese ay axırında küzäteläçäk häm anı astronomnar “Zäñgär tulı ay” dip yörtä.

Bu siräk oçrıy torğan tabiğat’ küreneşe. Här yıl 12 tulğan ay bula. Amma bıyıl oktyabr’dä aynıñ ike tapqır tügäräklänüe säbäple älege san 13kä citä.  

Bu kük yözendäge küreneşneñ zäñgär dip ataluınıñ isä Aynıñ töse belän bäyläneşe yuq. “Zäñgär tulı ay” yäisä “Zäñgär ay” ataması inglizlärdä siräk oçrıy torğan waqıyğalarğa qarata äytelä torğan  “once in a blue moon” (berwaqıt zängär ayda) äytemennän alınğan.

31nçe oktyabr’däge tulğan aynı dön’yanıñ här poçmağınnan kürep bulaçaq.

Näq’ menä älege könne Zäñgär tulğan ay qabat 19 yıldan soñ, yäğ’ni 2039nçı yılda kötelä.