Mäktäplärne açu öçen - 7 milliard yevro
Könbatış illärendä koronavirus belän bäyle soñğı sannar häm waqıyğalar
Dön’yada koronavirus arqasında ğomere özelüçelär sanı 908 meñ 50dän arttı. Yoqtıru oçraqları 28 million 29 meñ 550dän, sawığuçılar sanı isä 20 million 106 meñnän kübräk.
Kovid-19 oçraqları häm aña bäyle ülemnär iñ küp terkälgän il bulıp AQŞ qala birä. Anda älegä qadär koronavirus 195 meñ 239 keşeneñ ğomeren özde, barlığı 6 million 549 meñ 475 yoqtıruçı açıqlandı. İlbaşı Donal’d Tramp kizüne ähämiyätsez kürsätüe turındağı süzlärgä: “Bez xalıqnı qurqıtırğa telämädek,”-dip cawap birde. Ul millät bularaq ışanıç häm köç kürsätergä teläwlären dä östäde.
Braziliyädä soñğı 24 säğat’tä 1075 keşe Kovid-19 säbäple ülde. Şul räweşle ildä virustan ğomere özelüçelär sanı 128 meñ 653kä citte. Yoqtıru oçraqları isä 35 meñ 816ğa artıp 4 million 199 meñ 332 keşe täşkil itte.
Meksikada soñğı täwlektä Kovid-19 belän bäyle ülüçelär sanı 611gä kübäyde häm 69 meñ 95 buldı. Yoqtıruçılar – 647 meñ 507.
İtaliyädä soñğı täwlektä koronavirus 14 keşene alıp kitte. Kizü başınnan birle ülüçelär sanı 35 meñ 577gä citte. 1434 yaña yoqtıru oçrağı östälgäç Kovid-19nı êläkterüçelär sanı 281 meñ 583 buldı. Xökümät räise Djuzeppe Konti mäktäplärne qabat açu öçen küp köç quyuların belderde. “Uqu yılı bezneñ bu êşlärebez näticäsendä başlayaçaq. Mäktäplär 14nçe sentyabr’dä tärtibe belän açılaçaq,”-dide ul. Konti monıñ öçen 7 milliard yevro bülenüen dä citkerde.
Franśiyädä soñğı täwlektä 30 keşeneñ ğomere koronavirus säbäple özelde. Şulay itep, yuğaltular 30 meñ 794kä citte. Tağın 8 meñ 577 keşe virus yoqtırdı häm koronaviruslılar sanı 344 meñnän arttı.
Avstraliyädä Kovid-19 iñ küp kürelgän Viktoriyä ştatında soñğı 24 säğat’tä 7 keşeneñ ğomere özelde. Töbäktäge yuğaltular 701gä citte. İl külämendä ülüçelär sanı isä 788.
