Bit küçerep utırtu operaśiyäse kiçergän täwge keşe ülde

AQŞta yöze küçerep utırtılğan täwge keşe Konni Kalp 57 yäşendä wafat buldı. Ul älege operaśiyä belän bäyle bulmağan başqa yoğışlı awıru êläkterep ülä.

2004nçe yılda ber ızğışu waqıtında ire Konni Kalpnıñ yözenä drobovik mıltıqtan ata. Xatınnıñ bite qurqınıç xälgä kilä, ul ber it kisäge şikelle bula. Konni ber küzen, qaznalığınıñ öske öleşen häm borınınıñ küp öleşen yuğalta. Anıñ sulış alu, is häm täm toyu mömkinlege bulmıy. Xatın bik küp operaśiyälär kiçerä, plastika xirurgları aña niçek tä bulsa yöz yasaw öçen tırışa. Ämma is sizü, sulaw, qatı rizıq aşaw säläten kire qaytara almıylar.

Nihayät’ 2008nçe yılda Konni Kalpka yöz transplantaśiyäse yasala. 22 säğat’lek operaśiyädän soñ ul üze sulış ala başlıy häm täm belän is sizä.  

Konni Kalp operaśiyädän soñ jurnalistlarga bäxetle buluın belderä. “Xäzer islärne sizä başladım. İt aşıy alam, teläsä-qaysı qatı rizıqnı aşıy alam. Barısı da yaxşığa taba bara,”-dip söyli ul.

 Konni Kalp mondıy operaśiyä kiçerüçelär arasında älegä iñ ozaq yäşäwçe sanala.